SHBA propozon takim Trump-Putin-Zelensky për Ukrainën

SHBA propozon takim Trump-Putin-Zelensky, i dërguari amerikan niset drejt Rusisë

Shtetet e Bashkuara po shtyjnë përpara një iniciativë të re diplomatike për t’i dhënë fund luftës në Ukrainë, duke propozuar një takim të drejtpërdrejtë mes presidentit amerikan Donald Trump, presidentit rus Vladimir Putin dhe presidentit ukrainas Volodymyr Zelensky.

Propozimi do t’i paraqitet Kremlinit nga i dërguari special i Shtëpisë së Bardhë, Steve Witkoff, i cili pritet të zhvillojë një takim me udhëheqjen ruse në Shën Petersburg. Nisma vjen pas bisedimeve të zhvilluara në Oslo mes delegacioneve amerikane, ukrainase dhe përfaqësuesve evropianë, me synimin për të krijuar kushtet për një armëpushim dhe një marrëveshje paqeje.

Kryeministri i Norvegjisë, Jonas Gahr Støre, i cili ishte mikpritës i takimit në Oslo, tha se Witkoff do të paraqesë propozimet e përgatitura nga partnerët evropianë dhe amerikanë, përfshirë edhe idenë e një samiti trepalësh mes Trump, Putin dhe Zelensky.

“Sot kemi zhvilluar bisedime të mira dhe konstruktive, të nevojshme pas ngjarjeve të javës së kaluar. Steve Witkoff do të fluturojë nesër drejt Shën Petersburgut, ku do të takohet me udhëheqjen ruse dhe do të shkëmbejë idetë dhe propozimet e diskutuara në këtë takim. Kjo mund të hapë rrugën për një takim në nivel drejtuesish”, deklaroi Støre.

Përpjekjet për të siguruar një takim të drejtpërdrejtë mes Putin dhe Zelensky kanë dështuar disa herë gjatë viteve të fundit. Moska ka këmbëngulur vazhdimisht se një takim i tillë mund të zhvillohet vetëm në kushte të caktuara dhe në territorin rus.

Presidenti ukrainas Volodymyr Zelensky e vlerësoi pozitivisht takimin në Oslo, duke theksuar se çështjet që lidhen me të ardhmen e territoreve ukrainase mund të diskutohen vetëm në nivelin më të lartë politik.

“Ka qenë një ditë pozitive. Çështjet që kanë të bëjnë me të ardhmen e territorit ukrainas mund të diskutohen vetëm nga liderët. Çdo marrëveshje paqeje duhet të përfshijë garanci reale sigurie dhe Ukraina duhet të jetë pjesë e hartimit të saj”, u shpreh Zelensky.

Sipas presidentit ukrainas, një zgjidhje e qëndrueshme nuk mund t’i imponohet Kievit pa pjesëmarrjen e drejtpërdrejtë të Ukrainës në procesin negociator.

Nisma e re amerikane vjen në një moment tensionesh mes Uashingtonit dhe Kievit, por edhe në një kohë kur përpjekjet diplomatike për t’i dhënë fund konfliktit po intensifikohen. Vëmendja tani është përqendruar te përgjigjja që do të japë Vladimir Putin ndaj propozimit për negociata dhe mundësisë së një takimi historik trepalësh mes liderëve të SHBA-së, Rusisë dhe Ukrainës. /rtsh/