Guardiola largohet zyrtarisht nga City: Erdhi momenti, asgjë nuk është e përjetshme!

Pas 10 sezonesh të mbushura me suksese, trajneri spanjoll lë Manchester-in. Do të jetë “ambasador i klubit” anglez në të ardhmen.

Fundi i një epoke tani është zyrtar. Pep Guardiola nga e hëna nuk do të jetë më trajner i Manchester City. Ka ardhur njoftimi i klubit, që i paraprin konferencës për shtyp për me ndeshjen me Aston Villa-n. Në këtë ndeshje tifozët do të përshëndesin trajnerin që transformoi klubin në një fuqi të futbollit botëror, me 20 trofe të fituar në 10 sezone.

“Nuk ka ndonjë arsye specifike pse po largohem. Brenda meje ndjej që ka ardhur momenti t’ju përshëndes”, – ka thënë spanjolli për sitin e klubit anglez.

Pep në fakt nuk largohet nga brandi “City”: do të vazhdojë si “Global Ambassador” i City Football Group. Në këtë rol, sipas komunikatës së klubit, Guardiola “do të japë këshilla, duke punuar mbi projekte specifike dhe bashkëpunime”. Mbetet megjithatë, fundi i një ere.