Liverpool dhe Chelsea ndajnë pikët në derbin anglez

Liverpool dhe Chelsea kanë ndarë pikët duke luajtur baras 1-1, të shtunën në ‘Anfield’ në derbin e kësaj fundjavë në Premier League.

Chelsea arriti të shmangë humbjen e radhës në kampionat, duke ndalur një seri negative që rrezikonte të bëhej më e keqja që nga viti 1952. Megjithatë, barazimi i lë “Blutë” ende jashtë zonës që siguron kualifikimin në garat evropiane, duke rritur presionin në javët e fundit të sezonit.

Liverpool kaloi i pari në avantazh me një gol spektakolar të Ryan Gravenberch, i cili përfundoi saktë një goditje nga distanca pas një topi të kthyer në zonë. Më herët, vendasit kishin rrezikuar edhe me një goditje të lirë të Dominik Szoboszlai, por mbrojtja e Chelseat reagoi në kohë.

Chelsea u rikthye në lojë në fundin e pjesës së parë, kur një goditje e lirë e ekzekutuar nga Enzo Fernández përfundoi në rrjetë, duke rikthyer baraspeshën në “Anfield”, në një moment ku u diskutua edhe devijimi i mundshëm nga mbrojtja vendase.

Në pjesën e dytë, tensioni u rrit edhe më shumë. Cole Palmer mendoi se i kishte dhënë epërsinë Chelseat, por goli u anulua pas rishikimit nga VAR për pozicion jashtë loje në ndërtimin e aksionit.

Liverpool gjithashtu iu afrua golit të dytë, me Virgil van Dijk dhe Szoboszlai që goditën shtyllën dhe traversën në dy raste të pastra. Megjithatë, asnjëra skuadër nuk arriti të gjente golin e fitores deri në fund.

Pas këtij rezultati, Chelsea mbetet në një pozitë të vështirë në garën për Evropë, ndërsa Liverpool ende nuk e ka siguruar zyrtarisht pjesëmarrjen në Ligën e Kampionëve për sezonin e ardhshëm.