PSG mposht Bayernin në sfidën e ‘çmendur’

Paris Saint-Germain ka marrë një fitore dramatike 5-4 ndaj Bayern Munich në ndeshjen e parë gjysmëfinale të UEFA Champions League, në një përballje të jashtëzakonshme me gola dhe emocione të mëdha në “Parc des Princes”, raporton Rekordi.net.

Takimi nisi me intensitet të lartë, ku Bayern kaloi i pari në epërsi në minutën e 17-të përmes penalltisë së shndërruar në gol nga Harry Kane, pas një ndërhyrjeje në zonë. Sulmuesi anglez regjistroi golin e tij të 54-t këtë sezon dhe u bë lojtari i parë anglez që shënon në gjashtë ndeshje radhazi në Champions League.

PSG reagoi shpejt me golin e barazimit nga Khvicha Kvaratskhelia, para se João Neves të përmbyste rezultatin me një goditje me kokë pas një korneri të ekzekutuar nga Ousmane Dembélé. Bayerni u rikthye sërish në lojë me Michael Olise, i cili barazoi shifrat në 2-2, por në fund të pjesës së parë PSG fitoi penallti pas një rishikimi të VAR-it, të cilën Dembélé e konkretizoi për 3-2.

Në pjesën e dytë, spektakli vazhdoi. Kvaratskhelia shënoi golin e katërt për PSG, ndërsa Dembélé realizoi edhe golin e pestë vetëm pak minuta më vonë. Bayern u përgjigj me golin e Upamecano dhe më pas Luis Díaz ngushtoi diferencën në 5-4, duke mbajtur gjallë shpresat për ndeshjen e kthimit.

PSG pati mundësi të mbyllte ndeshjen me golin e gjashtë, por u ndal nga traversa në fund të takimit. Me këtë fitore, skuadra e Luis Enrique regjistroi triumfin e 100-të në Champions League dhe ndërpreu serinë pozitive të Bayern Munich.

Ndeshja e kthimit luhet javën e ardhshme në “Allianz Arena”, ku pritet një tjetër duel i fortë për një vend në finale. /Rekordi.net