Dëmtimi i gypit nga kontraktorë privatë lë pa ujë disa zona në Obiliq

Kompania Rajonale e Ujësjellësit “Prishtina” ka njoftuar se furnizimi me ujë të pijshëm është ndërprerë për disa lokalitete në komunën e Obiliqit. Shkak për këtë ndërprerje është bërë dëmtimi i një gypi furnizues nga palë të treta.

Sipas njoftimit zyrtar, kontraktorë privatë kanë dëmtuar gypin e tipit Ø200 ACC dhe nuk e kanë raportuar dëmin e shkaktuar tek autoritetet përkatëse.

Zonat e prekura nga ndërprerja janë:

• Një pjesë e qytetit të Obiliqit (konkretisht lagjja në drejtim të termocentralit Kosova B);
• Fshati Plemetin;
• Fshati Prelluzhë;
• Fshati Hamidi.

KRU “Prishtina” ka bërë të ditur se furnizimi do të rikthehet sapo të përfundojë sanimi i plotë i defektit.

“Ju njoftojmë se, si pasojë e dëmtimit të gypit Ø200 ACC nga kontraktorë privatë, të cilët kanë shkaktuar dëmin dhe nuk e kanë raportuar atë, është ndërprerë furnizimi me ujë të pijshëm. Pa furnizim me ujë të pijshëm kanë mbetur: një pjesë e qytetit të Obiliqit (lagjja kah Kosova B), fshatrat Plemetin, Prelluzhë dhe Hamidi”, tha KRU “Prishtina”.