Von der Leyen: Samiti i Parisit me objektiv të qartë; të mbrojë Ukrainën nga çdo sulm rus në të ardhmen

Presidentja e Komisionit Evropian Ursula von der Leyen ka deklaruar se liderët e “Koalicionit të Vullnetit” që mblodhën sot në Paris kanë një  qëllim të qartë: të ofrojnë garanci sigurie për Ukrainën, në mënyrë që të bëjnë të pamundur çdo sulm të ardhshëm rus.

“Koalicioni i Vullnetit po takohet sot në Paris. Qëllimi ynë është i qartë: të ofrojmë garanci të fuqishme sigurie për Ukrainën”, theksoi von der Leyen.

Ajo tha se kjo mund të arrihet përmes “forcave të armatosura ukrainase të fuqishme që mund të pengojnë sulmet e ardhshme, një force multinacionale për parandalim dhe angazhime detyruese për të mbështetur Ukrainën në rast të një sulmi të ardhshëm nga Rusia”.

Sipas saj, anëtarësimi i Ukrainës në BE do të shërbejë si garanci kyçe sigurie dhe si shtyllë qendrore e propozimit të Bashkimit Evropian për prosperitetin transformues të Ukrainës.

Presidenti i Këshillit Evropian Antonio Costa, i cili mbërriti gjithashtu në Paris për takimin e liderëve të Koalicionit të Vullnetshëm, tha se Bashkimi Evropian do të mbështesë Ukrainën në çdo hap për të siguruar sovranitetin, sigurinë dhe prosperitetin e saj.

Samiti i mbajtur në Pallatin Élysée me pjesëmarrjen e presidentit ukrainas Volodymyr Zelensky, mbi 27 krerëve shtetesh dhe përfaqësuesve të lartë amerikanë si Steve Ëitkoff dhe Jared Kushner, shihet si një përpjekje kyçe për të koordinuar garancitë e sigurisë para negociatave të mundshme për paqe. /rtsh/