Superliga rikthehet sot me dy superduele

Superliga e Kosovës rikthehet këtë fundjavë me ndeshjet e xhiros së 13-të, e cila pritet të sjellë duele interesante.

Sot do të zhvillohen dy përballje: njëra në Skënderaj dhe tjetra në Podujevë.

Në stadiumin “Bajram Aliu”, Drenica do të jetë nikoqire e Ballkanit.

Skuadra drenicase barazoi pa gola me Prishtinën e Re në xhiron e kaluar, ndërsa suharekasit, të udhëhequr nga Orges Shehi, barazuan në shtëpi me Ferizajn.

Në ndeshjen e parë mes këtyre dy ekipeve këtë sezon, Ballkani kishte fituar me rezultat të pastër 3-0.

Ndërkohë, në stadiumin “Zahir Pajaziti”, Llapi pret Prishtinën e Re.

Llapi vjen në këtë takim pas humbjes nga Drita në Gjilan, ndërsa Prishtina e Re barazoi me Drenicën fundjavën e kaluar.

Një nga dy fitoret e vetme të Prishtinës së Re këtë sezon është pikërisht ndaj Llapit, me rezultatin 1 me 0, në ndeshjen e zhvilluar në shtator.

Megjithatë, kjo skuadër nuk ka shijuar fitoren në tetë ndeshjet e fundit, duke regjistruar gjashtë humbje dhe dy barazime.

Të dy ndeshjet e së shtunës do të nisin nga ora 13:00.