Busquets i jep fund karrierës në fund të sezonit

Mesfushori spanjoll, Sergio Busquets, ka njoftuar se në fund të këtij sezoni do të largohet nga futbolli i luajtur.

Futbollisti i Inter Miamit e bëri publik vendimin përmes një videoje të shpërndarë në rrjetet e tij sociale, gjatë natës mes së enjtes dhe të premtes.

“Për mua do të jenë muajt e fundit në fushat e futbollit. Ju falënderoj të gjithëve dhe ju jam mirënjohës për mbështetjen e dhënë”, ka deklaruar 37-vjeçari.

Ai shtoi se pas 20 vitesh karrierë si futbollist profesionist ka ardhur momenti i duhur për t’u tërhequr.

Busquets është një nga emrat më të njohur të futbollit spanjoll dhe botëror. Karrierën e tij e ndërtoi kryesisht me Barcelonën, ku fitoi gjithçka, përfshirë Ligën e Kampionëve dhe shumë trofe vendorë.

Ai është po ashtu pjesë e gjeneratës së artë të Spanjës që fitoi Kupën e Botës 2010 dhe Kampionatin Evropian 2012.

Aktualisht, Busquets po luan në Shtetet e Bashkuara me Inter Miamin, ku është bashkuar me Lionel Messin dhe yje të tjerë të futbollit.