Zyrtare së shpejti? Simone Inzaghi drejt Al-Hilal

Skuadra saudite Al-Hilal pritet të emërojë trajnerin aktual të Interit, Simone Inzaghi, si trajnerin e tyre të ri, menjëherë pas përfundimit të finales së Ligës së Kampionëve që zhvillohet sonte, shkruan Rekordi.net.

Sipas Sky Sports, drejtuesit e klubit arab janë në negociata të avancuara me teknikun italian, i cili ka tërhequr vëmendjen me paraqitjet mbresëlënëse të Interit në kampionat dhe në Evropë. Lëvizja pritet të finalizohet menjëherë pas ndeshjes së mbrëmjes së sotme.

Nëse marrëveshja konkretizohet, Inzaghi do t’i bashkohej një vale të re trajnerësh dhe yjesh të futbollit evropian që po transferohen drejt kampionatit saudit, i cili po përjeton një rritje të ndjeshme në investime dhe cilësi gjatë sezoneve të fundit.

Mbetet të shihet nëse finalja e Ligës së Kampionëve do të jetë ndeshja e fundit e Inzaghit në krye të Interit – dhe a do të largohet nga Europa si kampion? /Rekordi.net