Walker në Reçak: Mbetem i mahnitur nga numri i njerëzve që vinë këtu

Njëzetegjashtë vjet më parë, ishte i pari që i kishte thënë botës që në Reçak po kryhet krim kundër njerëzimit.

Gati tri dekada ma pas, shefi i atëhershëm i Misionit Verifikues të OSBE-së në Kosovë, ambasadori William Walker është kthyer në fshatin të cilin dikur pak kush e njihte.

Pas homazheve në Kompleksin Memorial, ai ka thënë se është i mahnitur nga numri i madh i qytetarëve që po bëjnë homazhe në këtë kompleks.

“Çdo vit, mbetem i mahnitur nga numri i njerëzve që vinë këtu nga e gjithë vendi. Dikur ishte kryesisht një ceremoni përkujtimore e organizuar nga Komuna e Shtimes, por tani ka njerëz nga e gjithë Kosova, dhe supozoj se ka edhe nga e gjithë bota. Andaj, ju falënderoj që po e mbuloni këtë [ngjarje], ju uroj të gjithëve një ditë shumë të lumtur dhe i uroj gjithë popullit të Kosovës një Vit të Ri të lumtur. Faleminderit shumë”, ka thënë ai.

Mëngjesin e hershëm të 15 janarit 1999 ishin vrarë mizorisht fëmijë, të rritur e pleq, në mesin e tyre edhe një grua e moshuar, trupi i së cilës ende nuk është gjetur.

Ngjarja e rëndë në Reçak kishte nxitur reagimin e ndërkombëtarëve, ku NATO pati vendosur të sulmonte caqet ushtarake policore serbe – bombardime këto të zgjatën 78 ditë. Fundi i tyre është shënuar më 10 qershor 1999 kur edhe u ishte miratuar Rezoluta 1244 të Këshillit të Sigurimit të Kombeve të Bashkuara.

Pas kësaj, mbi 800 mijë shqiptarë të Kosovës, dhunshëm të dëbuar, filluan të ktheheshin në shtëpitë e tyre.