United rikthehet të “buzëqeshë”, tre arsyet pas formës së “Djajve të Kuq”
Manchester United po shijon një moment pozitiv në javët e fundit.
4 fitore në 5 ndeshjet e fundit, ardhja në formë e Rasmus Hojlund dhe rikthimet e shumë futbollistëve të dëmtuar kanë risjellë buzëqeshjen tek “Djajtë e Kuq”.
Triumfi i pastër 3-0 në shtëpi ndaj West Ham riktheu skuadrën në vendin e 6-të dhe 8 pikë larg vendit të katërt që mbahet nga Aston Villa. Pikërisht, Villa është ndalesa e radhës për United, që do të udhëtojë të dielën drejt Birmingham për një nga transfertat më përcaktuese të sezonit.
Sfida e fazës së parë ndërmjet dy ekipeve kujtohet mjaft mirë për përmbysjen e Djajve pas disavantazhit prej dy golash, ku Rasmus Hojlund gjeti dhe rrjetën e parë sezonale pas 14 ndeshjeve pa gol në Premier League. Që prej atij momenti, danezi ka shijuar formën më të mirë me fanellën e Djajve të Kuq. 5 gola të shënuar në 5 ndeshjet e fundit, përfshirë dhe FA Cup, e kanë çuar tanimë sulmuesin 21-vjeçar në kuotën e 10 golave në të gjitha kompeticionet, së bashku me realizimet në Champions League.
Nuk është aspak habi që forma më e mirë e Hojlund ka ardhur pasi Erik ten Hag përcaktoi në mënyrë fikse dhe sulmin për çdo ndeshje, me Rashford dhe Garnachon që janë kthyer në shoqëruesit e pandashëm të danezit nga krahët.
Investimet e United u kritikuan së tepërmi gjatë verës, për faktin që nuk arritën të transferojnë një tjetër mesfushor. Megjithatë, një të tillë e kanë gjetur nga akademia e tyre, me Kobbie Mainoo që e ka bërë të vetin vendin e titullarit, me 9 ndeshje të luajtura së fundmi dhe me një gol tri-pikësh ndaj Wolves në javën e kaluar, transmeton SS.
Në një sezon me shumë ulje-ngritje, me eliminim nga Champions League dhe dalje të shpejtë nga gara e titullit, Erik ten Hag nuk ka qenë gjithmonë në një pozicion të mirë, por rezultatet e fundit dhe rritja e nivelit të performancave, si dhe marrja e pikëve të domosdoshme, i kanë dhënë të drejtë holandezit kur shprehej pak muaj më parë:’’Më gjykoni kur të kem ekipin e plotë në dispozicion’’.