Ukraina i ofron Rusisë armëpushim 30-ditor pa kushte

Ukraina është gati për një armëpushim 30-ditor me Rusinë nga e hëna, tha sot ministri i Jashtëm ukrainas, Andrii Sybiha, ndërsa udhëheqësit evropianë u mblodhën në Kiev për të treguar mbështetje për përpjekjet e paqes.

“Ukraina dhe të gjithë aleatët janë gati për një armëpushim të plotë pa kushte në tokë, ajër dhe det për të paktën 30 ditë duke filluar që nga e hëna”, shkroi Sybiha në X.

“Nëse Rusia pranon dhe sigurohet monitorim efektiv, një armëpushim i qëndrueshëm dhe masa për ndërtimin e besimit mund të hapin rrugën për negociata paqeje”, shtoi ai.

Komentet e Sybihas erdhën gjatë një vizite të profilit të lartë në kryeqytetin ukrainas të shtunën nga kancelari gjerman Friedrich Merz, presidenti francez Emmanuel Macron, kryeministri britanik Keir Starmer dhe kryeministri polak Donald Tusk.

Grupi zhvilloi bisedime me presidentin ukrainas Volodymyr Zelensky dhe, sipas Sybihas, foli në telefon me presidentin amerikan Donald Trump.

Sybiha e quajti bisedën me Trump “të frytshme”.

Merz, në udhëtimin e tij të parë në Ukrainë si kancelar gjerman, paralajmëroi Moskën për pasoja të gjera nëse ajo refuzon armëpushimin, duke përfshirë një përshkallëzim të mprehtë të mbështetjes ushtarake dhe financiare për Ukrainën.

“Pastaj do të ketë një shtrëngim masiv të sanksioneve dhe do të ketë ndihmë të mëtejshme masive për Ukrainën”, i tha ai gazetës gjermane ”Bild”.

“Një paqe e drejtë dhe e qëndrueshme fillon me një armëpushim të plotë dhe të pakushtëzuar”, shkroi ndërkohë Macron në X. “Nëse Moska vazhdon të pengojë, ne do ta rrisim presionin – së bashku, si evropianë dhe në koordinim të ngushtë me Shtetet e Bashkuara”, tha ai.

Ai vuri në dukje se Ukraina kishte pranuar tashmë një propozim për armëpushim nga Uashingtoni më 11 mars, ndërsa akuzoi Rusinë për “vonesë, parakushte dhe lojë me kohën”.

Por zëdhënësi i Kremlinit, Dmitry Peskov, tha sot se Moska nuk do të frikësohej nga sanksionet e reja.

“Përpjekja për të na trembur me sanksione është e kotë”, tha ai për televizionin shtetëror rus.

Ai pohoi se Rusia aktualisht ka avantazhin në fushën e betejës dhe akuzoi Kievin se po shmang negociatat e vërteta.

Ndërsa ishin në Kiev, udhëheqësit evropianë morën pjesë në një ceremoni përkujtimore me Zelenskyn dhe Zonjën e Parë Olena Zelenska, duke vendosur fenerë dhe duke mbajtur një moment heshtjeje në një faltore publike në sheshin ”Maidan”. /atsh/