UEFA i përjashton tifozët e Dinamo Zagrebit pas vrasjes së tifozit grek

Shtëpia e futbollit evropian, UEFA, i ka përjashtuar tifozët e Dinamo Zagrebit nga të gjitha ndeshjet si mysafirë në garat evropiane këtë sezon, pasi një tifoz grek u vra në përleshjet e dhunshme në Athinë muajin e kaluar.

Ky vendim vjen disa orë pasi Zagrebi u eliminua nga Liga e Kampionëve pas barazimit 2:2 në ndeshjen kthyese kualifikuese kundër AEK-ut të Athinës në Greqi të shtunën, e cila ishte shtyrë për shkak të dhunës.

Një tifoz grek u vra gjatë përleshjeve mes përkrahësve rivalë të AEK-ut të Athinës dhe Dinamo Zagrebit në Athinë, 7 gusht 2023.

Ndeshja ishte paraparë të luhej më 8 gusht, por u shty për 19 gusht, pas vdekjes së 29-vjeçarit Michalis Katasouris, në përleshjet e dhunshme mes tifozëve pranë stadiumit të AKE-ut.

Gati 100 tifozë kroatë të futbollit u arrestuan në Athinë, nën akuza serioze penale, që përfshijnë vrasje dhe pjesëmarrje në një organizatë kriminale. Tifozët e Dinamos kishin udhëtuar për në Athinë, edhe pse klubi i tyre e kishte të ndaluar nga UEFA t’u shiste bileta atyre për këtë ndeshje, e cila cilësohej si e rrezikut të lartë.

Presidenti i UEFA-s, Aleksandar Ceferin, u takua me kryeministrin grek Kzriakos Mitsotakis të mërkurën në Athinë, për të diskutuar se si të përballen me dhunën në mesin e tifozëve të futbollit.

UEFA tha të dielën më 20 gusht se të gjithë ndeshjet e Dinamos cilësohen tani si “me rrezik të lartë dhe kjo u konfirmuar, fatkeqësisht, nga shkalla ekstreme e incidenteve” në Athinë.

Tifozët kroatë mbulojnë kokën me fanellat e tyre teksa dalin para gjykatës për t’u përballur me akuza të rënda për dhunën në Athinë.

Dinamo është urdhëruar nga UEFA ta “krijojë dhe zbatojë një strategji për ta çrrënjosur dhunën e ndërlidhur me klubin, në bashkëpunim me autoritetet politike, të sigurisë dhe të futbollit në Kroaci”.

“Dinamo dhe autoritetet publike duhet patjetër të ndërmarrin masa për të garantuar masa të nevojshme të sigurisë për tifozët vizitorë”, tha UEFA.

Dinamo do të përballet me Spata Pragën në dy ndeshje, ajo e kthimit më 31 gusht në Pragë.

Fituesi i këtij dueli do të kalojnë në fazën grupore të Ligës së Evropës, kategorinë e dytë të futbollit evropian. Humbësi shkon në grupet e Ligës së Konferencës, që nënkupton se Dinamo do t’i luajë të paktën edhe gjashtë ndeshje të tjera – tri në shtëpi e tri jashtë – nga shtatori deri në dhjetor.

Dinamo e ka një grup të tifozëve të ekstremit të djathtë, i cili e quan veten “Djelmoshat e Këqij Blu”. /REL/