Trump njofton tarifat e reja, 10% për Mbretërinë e Bashkuar dhe 20% për BE-në

Presidenti amerikan, Donald Trump ka njoftuar një valë tarifash të reja doganore ndaj shumë shteteve, duke deklaruar një taksë universale “bazë” prej 10% për importet në SHBA, teksa e ka quajtur atë si “Dita e Çlirimit”.

Trump konfirmoi një tarifë prej 10% për mallrat e Mbretërisë së Bashkuar dhe 20% për mallrat e BE-së, teksa tha se do të fillojë një “epokë të artë” për Amerikën.

“Ata na kanë marrë kaq shumë nga pasuria jonë. Ne nuk do ta lejojmë këtë të ndodhë. SHBA nuk mund të përballojë më të mbajë deficite tregtare me vendet e tjera, që i ka subvencionuar ato për një kohë të gjatë. Ne kujdesemi për vendet në të gjithë botën, por është koha që SHBA të kujdeset për njerëzit e saj”, tha ai.

Trump njoftoi gjithashtu një tarifë prej 25% për të gjitha automjetet e prodhuara nga jashtë vendit që do të fillojë nga mesnata me orën lokale. Tarifat janë një taksë për mallrat e importuara nga jashtë që, sipas Trump, do të adresojnë tregtinë “e padrejtë” me vendet e tjera.

Për kompanitë që ndërtojnë produktet e tyre në SHBA, Trump tha se do të paguajnë zero tarifa.

“Nuk ka tarifë nëse e ndërtoni produktin tuaj këtu në Amerikë,” theksoi ai.

Ai pati edhe një mesazh për udhëheqësit e huaj, teksa i kërkoi të ulin tarifat e tyre, nëse duan tarifa më të ulëta nga SHBA.

“Tarifat i japin vendit tonë mbrojtje kundër atyre që do t’i bënin dëm ekonomik SHBA-së dhe shumë njerëz po kërkonin t’i bënin dëm ekonomik SHBA-së. Ndoshta jo aq qartë, por ata po bënin dëme të jashtëzakonshme ekonomike. Këto tarifa do të na japin rritje si nuk e keni parë më parë“, u shpreh ai.