Trump mbron Infantinon: FIFA do të bënte gabim të madh nëse e largon

Presidenti i SHBA-së, Donald Trump, ka dalë në mbështetje të presidentit të FIFA-s, Gianni Infantino, i cili po përballet me presion të madh për shkak të planit të dështuar për lejimin e investimeve private në Kupën e Botës.

Federatat e futbollit nga Evropa, Amerika e Veriut dhe Azia kanë kërkuar largimin e Infantinos, ndërsa kanë bërë thirrje edhe për një rishikim të pavarur të propozimit të braktisur.

Në një letër të përbashkët, federatat kanë deklaruar se Infantino ka dëmtuar besimin e tyre përmes “mashtrimit” dhe se ka “vendosur veten mbi kolektivin”.

Pavarësisht presionit, Trump ka vendosur ta mbështesë publikisht Infantinon, me të cilin ka pasur bashkëpunim të ngushtë gjatë Kupës së Botës 2026.

Trump ka thënë se FIFA nuk do të ishte “kurrë aq e suksesshme apo fitimprurëse” pa Infantinon.

“FIFA do të bënte një gabim të tmerrshëm nëse, për çfarëdo arsye, do të mendonte ta zëvendësonte presidentin Gianni Infantino. Ai është fantastik dhe sapo ka drejtuar Kupën e Botës më të suksesshme, katër herë më të suksesshme se çdo tjetër që është zhvilluar më parë”, ka deklaruar Trump.

Marrëdhënia mes Trumpit dhe Infantinos është e afërt. Në dhjetor të vitit 2025, presidenti i FIFA-s i dha Trumpit çmimin e parë të Paqes të FIFA-s, një vendim që shkaktoi polemika të shumta.

Mbështetja e Trumpit vjen vetëm disa ditë pasi “The Daily Telegraph” dhe UEFA raportuan se Infantino kishte bërë një “pagesë largimi” ndaj një gruaje që raportohet se kishte qenë në një lidhje me të gjatë kohës kur ai ishte sekretar i përgjithshëm i UEFA-s.

Pavarësisht mbështetjes nga presidenti amerikan, presioni ndaj Infantinos vazhdon të rritet dhe e ardhmja e tij në krye të FIFA-s mbetet e pasigurt.