Tregjet aziatike bien pas tarifave të SHBA

Tregjet e aksioneve në Azi janë zhytur të hënën, ndërsa ndikimi i tarifave të Presidentit Donald Trump vazhdon të shkaktojë valë tronditëse në mbarë botën. Indeksi Nikkei 225 i Japonisë ra me 6.3%, ndërsa në Hong Kong, Indeksi Hang Seng u ul me 9.8%, duke shënuar një rënie të thellë. Aksionet e listuara në Hong Kong të bankave të mëdha britanike, HSBC dhe Standard Chartered, gjithashtu pësuan rënie të konsiderueshme.

Po ashtu, kontratat e së ardhmes në SHBA ishin ndjeshëm në rënie, duke sugjeruar se aksionet e Wall Street do të përballen me humbje të mëdha kur tregjet amerikane të hapen më vonë gjatë ditës.

Presidenti Donald Trump, gjatë një deklarate të bërë para gazetarëve në Air Force One, ka mbrojtur politikën e tij tarifore, duke thënë se “ndonjëherë duhet të marrësh ilaçe për të rregulluar diçka”, duke nënkuptuar se tarifa janë një mjet i nevojshëm për të korrigjuar deficitet tregtare.

Ndërkohë, Bill Ackman, një nga mbështetësit më të shquar të Trump në Wall Street, ka paralajmëruar se tarifat mund ta çojnë ekonominë globale në një “dimër bërthamor ekonomik”. Ai ka bërë thirrje për një pauzë prej 90 ditësh në zbatimin e tarifave, duke argumentuar se ndikimi i këtyre politikave mund të jetë shkatërrues për ekonominë botërore, raporton rtsh.