Topi i Artë, ku ishte Haaland? Guardiola: Nuk kam dyshim se është i lumtur për Rodrin

Ndërsa mosmarrëveshjet dhe polemika godasin France Football dhe zgjedhjen e Rodrit si fitues i Topit të Artë 2024, ka dhe nga ata që duket se nuk e vrasin mendjen shumë për këtë çmim individual. Përveç vendimit të bujshëm të Real Madridit për të mos u paraqitur në ceremoninë e mbrëmshme në Paris, ajo që ra në sy ishte edhe mungesa e Erling Haaland.

Ku ishte sulmuesi i Manchester City-t? Pasi arriti në vendin e 5-të për Topin e Artë, në vend që të shkonte në Théâtre du Châtelet në Paris, ai preferoi të hipte në një fluturim direkt për në Suedi për të parë nga afër fitoren në kampionat të shokut të tij të fëmijërisë Erik Botheim, në fushë me Malmoe.

Marrëdhënia mes të dyve ka lindur në ekipin e të rinjve të Norvegjisë dhe prania e sulmuesit të pagabueshëm të Guardiolës është raportuar nga vetë Haaland me një postim në Instagram.

Duke folur për këtë, menaxheri i Manchester City, Pep Guardiola, iu desh t’i përgjigjej pyetjes për udhëtimin e Haaland në Suedi: “Ai dhe e dashura e tij, Isabelle së shpejti do të bëhen prindër, ne kemi vetëm disa ditë pushim. Ai shkoi (në ceremoninë e çmimeve) sezonin e kaluar. Ndonjëherë shkoni, ndonjëherë jo. Nuk duhet të shpjegojë motivin. Nuk është aspak problem. Ai është i lumtur për Rodrin, nuk kam asnjë dyshim për këtë”.