Të paktën 15 persona shtypen për vdekje gjatë festivalit fetar në Indi

Të paktën 15 jetë të humbura raportohet të jetë bilanci paraprak i një tragjedie në veri të Indisë, gjatë mbajtjes së festivalit më të madh fetar në botë.

Mjekët në qytetin e Prajagrajit në Utar Pradesh i thanë agjencisë franceze AFP se viktimat u shtypën për vdekje nga të tjerët teksa merrnin pjesë në festivalin hindu të Mahakumb Melasë. Deri në ditën e fundit, më 26 shkurt, mendohet se 400 milionë pelegrinë do e vizitojnë atë.

Festivali i sivjetëm i mbajt në një zonë prej më shumë se 4 mijë hektarësh me tenda të ngritura përgjatë gjithë hapësirës, ndërsa e mërkura është një nga ditët më të shenjta në festivalin gjashtëjavor.

Në pamjet e publikuara në internet, ekipet e shpëtimit u shfaqën duke transportuar trupat e pajetë nga një truall i mbushur me veshje e këpucë të hedhura gjithandej.

Incidenti ndodhi rreth orës 1 të mesnatës, kur disa prej pelegrinëve tentuan të kalonin barrikadat e policisë për të arritur Hundën e Sangamit, pikën ku takohet lumi i shenjtë për Indinë, Ganges, me lumenjtë mitikë Jamuna dhe Sarasvait. Sipas besimtarëve, larja me ujin e lumit i çliron ata nga mëkatet.

Shumë persona u dërguan në një spital të afërt të ngritur posaçërisht për qëllimet e festivalit.

Këtë muaj, në një tjetër rast të ngjashëm humbën jetën gjashtë indianë të shtypur gjatë vizitës në një prej tempujve të Indisë Jugore, ndërsa vitin e kaluar e kaluar tragjedia ishte edhe më e rëndë në distriktin Hathras të Utar Pradeshit, ku gjetën vdekjen mbi 120 persona gjatë një feste fetare. /AJ, BBC