Sigal Prishtina triumfon në Gjakovë, mund Vëllaznimin

Para Final 8 Kupës së Kosovës, Sigal Prishtina ka shënuar fitore ndaj Vëllaznimit në Gjakovë me rezultat 64:71 (23:15, 19:22, 9:17, 13:17), në javën e 21-të të Superligës së Kosovës në basketboll.

Pas një fillimi të barabartë, kuqezinjtë shkëputen në 19:11, derisa çerekun e parë e fitojnë 23:15. Bardhekaltrit rikthehen në periudhën e dytë për të ngushtuar shifrat, ku pjesa e parë përfundon 42:37.

Perioda e tretë ishte vendimtare, pasi prishtinasit ishin më të mirë për të përmbysur shifrat dhe me lojë të mirë vazhduan edhe në dhjetë minutat e fundit për të fituar 64:71.

Te vendasit u dalluan Myreon Jones dhe Jahenns Manigat me nga 18 pikë, derisa te mysafirët më të mirët ishin Dardan Berisha me 18 pikë dhe Donte Clark me 16 pikë e tetë kërcime.

Vëllaznimi mbetet i pesti me nëntë fitore e 12 humbje, kurse Sigal Prishtina e treta me 14 fitore e shtatë humbje.