Shqipëria e Sylvinhos rishkruan historinë

Kombëtarja shqiptare nën drejtimin e trajnerit Sylvinho ka rishkruar historinë e saj, duke marrë gjashtë rezultate pozitive radhazi, ndër të cilat pesë fitore.

Brenda pesë muajve, nga 17 qershori deri më 17 tetor 2023, kuqezinjtë kanë marrë pesë fitore dhe një barazim, pa e njohur shijen e humbjes.

Nga këto gjashtë rezultate, pesë janë në ndeshje zyrtare, për kualifikueset e EURO 2024, dhe vetëm e fundit, kundër Bullgarisë, ishte miqësore.

Të njëjtin numër ndeshjesh pozitive arriti edhe paraardhësi i Sylvinhos, Edi Reja, nga 11 tetori 2020 deri më 25 mars 2021, por me një fitore më pak, duke pasur dy barazime, ndërkohë që edhe ndeshjet zyrtare ishin në Nations League, me kundërshtarë të niveleve më të ulët se të tanishmit.

Deri tani, rekordi për seri pozitive ndeshjesh është në periudhën 14 nëntor 2009 deri më 8 tetor 2010, tetë ndeshje, shtatë të parat nën drejtimin e kroatit Josip Kuze dhe e fundit nën drejtimin e Xhemal Mustedanagiç.

Edhe ajo seri përmbante pesë fitore, tri të tjerat ishin barazime, por pesë nga tetë ndeshjet ishin miqësore e me kundërshtarë si Andora, Estonia e Uzbekistani. Në tri ndeshjet zyrtare, u arritën dy barazime dhe një fitore 1-0 kundër Luksemburgut.

Shqipëria e Sylvinhos nuk pëson gol në tri ndeshje radhazi, katër po të logarisim vetëm ndeshjet brenda. Në eliminatoret evropiane, Shqipëria ka pësuar tre gola dhe vetëm Franca ka bërë më mirë, me një të pësuar.

Ndërkaq, me 11 golat e shënuar, kuqezinjtë tregojnë se nuk janë një skuadër mbrojtëse.