SHBA përjashton pajisjet elektronike nga tarifat reciproke ndaj Kinës

Shtetet e Bashkuara kanë vendosur të përjashtojnë një sërë pajisjesh elektronike të importuara nga Kina nga tarifat reciproke të vendosura nga Presidenti Donald Trump, sipas një njoftimi zyrtar nga Doganat dhe Mbrojtja Kufitare e SHBA-së.

Sipas këtij vendimi, produkte si telefonat inteligjentë, monitorët e kompjuterëve dhe pjesë të ndryshme elektronike nuk do t’i nënshtrohen tarifës prej 145% që u vendos kohët e fundit ndaj mallrave kineze. Përjashtimi zbatohet për produktet që hyjnë në SHBA dhe pritet të ketë një ndikim të rëndësishëm te gjigantët e teknologjisë si Apple, që varen nga prodhimi në Kinë për shumë nga pajisjet e tyre.

Megjithatë, përjashtimi nuk përfshin tarifën prej 20% për mallrat kineze që lidhen me rolin e Kinës në tregtinë ndërkombëtare të fentanilit – një çështje që ka ngritur shqetësime të thella për shëndetin publik në SHBA.

Në një deklaratë zyrtare, sekretarja e shtypit e Shtëpisë së Bardhë, Karoline Leavitt, theksoi se Presidenti Trump po nxit kompanitë e mëdha të teknologjisë që të zhvendosin prodhimin në SHBA, duke theksuar rëndësinë e pavarësisë teknologjike.

“Presidenti Trump e ka bërë të qartë se Amerika nuk mund të mbështetet te Kina për të prodhuar teknologji kritike si gjysmëpërçues, çipa, telefona inteligjentë dhe laptopë. Kjo është arsyeja pse Presidenti ka siguruar triliona dollarë në investime amerikane nga kompanitë më të mëdha të teknologjisë në botë për të nisur prodhimin në Shtetet e Bashkuara sa më shpejt të jetë e mundur,” tha Leavitt.

Ekspertët thonë se përjashtimi i tarifave për pajisjet elektronike mund të ndihmojë në ruajtjen e çmimeve të qëndrueshme për konsumatorët amerikanë, por zhvendosja e prodhimit brenda SHBA-së do të kërkojë kohë dhe investime. /rtsh/