SHBA nënshkruan disa marrëveshje me Arabinë Saudite, Trump: Marrëdhënie më e fortë se kurrë

Presidenti i SHBA-së, Donald Trump dhe Princi i Kurorës së Arabisë Saudite, Muhammad bin Salman, nënshkruan të martën (13 maj) një sërë marrëveshjesh mes dy vendeve, për energjinë, minierat dhe mbrojtjen.

Shtëpia e Bardhë tha se SHBA dhe Arabia Saudite kanë nënshkruar një marrëveshje shitjeje të mbrojtjes me vlerë gati 142 miliardë dollarë, e cila i siguron Riadit pajisje dhe shërbime të teknologjisë së fundit nga firmat amerikane.

Po ashtu marrëveshja e mbrojtjes është pjesë e një angazhimi investimi prej 600 miliardë dollarësh nga Arabia Saudite për SHBA-në.

Marrëveshja përfshin gjithashtu eksportet e turbinave me gaz të GE dhe zgjidhjeve energjetike me një total prej 14.2 miliardë dollarësh, dhe avionëve të pasagjerëve Boeing 737-8 me një total prej 4.8 miliardë dollarësh.

Në fjalën e tij, presidenti amerikan Trump vlerësoi marrëdhëniet SHBA-Saudite si më të forta se kurrë më parë.

“Sot ne ndërmarrim hapat e ardhshëm për ta bërë marrëdhënien tonë më të ngushtë, më të fortë dhe më të fuqishme se kurrë më parë. Është më i fuqishëm se kurrë më parë.”, tha presidenti amerikan.

Princi i Kurorës së Arabisë Saudike tha se “dy vendet tona kanë marrëdhënie të thella ekonomike Investimet e përbashkëta ishin një nga shtyllat më të rëndësishme të marrëdhënies sonë ekonomike”, tha ai.

Çfarë përfshin marrëveshja?

Promovimi i Forcave Ajrore dhe aftësive hapësinore

Mbrojtja ajrore dhe raketore

Siguria detare dhe bregdetare

Siguria kufitare dhe modernizimi i forcave tokësore

Përmirësimet e sistemeve të informacionit dhe komunikimit

Nga ana tjetër, Arabia Saudite është zotuar të investojë 600 miliardë dollarë në Shtetet e Bashkuara.

Gjithashtu do të investojë 20 miliardë dollarë në qendrat e të dhënave të inteligjencës artificiale në SHBA.

Presidenti Trump, njoftoi se planifikon të heqë sanksionet kundër Sirisë gjë që, sipas tij, “do t’i japë vendit një mundësi”.

Duke iu referuar luftës Izrael-Gazë, ai tha se populli i Gazës “meriton një të ardhme shumë më të mirë”, por shtoi se kjo nuk mund të ndodhë për sa kohë që udhëheqësit e tyre “zgjedhin të rrëmbejnë, torturojnë dhe shënjestrojnë njerëz të pafajshëm”.

Presidenti i Shteteve të Bashkuara të Amerikës, Donald Trump, mbërriti në kryeqytetin saudit, Riad, më 13 maj, duke shënuar fillimin e një udhëtimi katër ditor në rajonin e Gjirit Persik, që do ta çojë atë në Katar dhe Emiratet e Bashkuara Arabe./BBC