Rinisja e sulmeve izraelite në Gazë, Macron: Të rikthehet armëpushimi

Princi i kurorës saudit Mohammed bin Salman dhe presidenti francez Emmanuel Macron diskutuan përpjekjet për të ndalur sulmet ajrore izraelite në Rripin e Gazës.

Në një njoftim Ministria e Jashtme saudite bën të ditur se udhëheqësit diskutuan përmes telefonit zhvillimet rajonale, sulmet ajrore izraelite në Gazë dhe përpjekjet për të ndalur këto sulme dhe për të mbrojtur civilët.

Nga ana e tij, Macron, dënoi rifillimin e sulmeve izraelite në Gaza.

“Kthimi në armëpushim është thelbësor për lirimin e të gjithë pengjeve dhe mbrojtjen e civilëve,” tha ai në X.

Udhëheqësi francez përshëndeti punën e kryer nga Arabia Saudite me partnerët e saj arabë “në një kuadër të besueshëm për të nesërmen në Gaza, i cili duhet të shërbejë si bazë për diskutime”.

“Ne do të punojmë së bashku për të rihapur një horizont politik shumë të nevojshëm. Konferenca për zgjidhjen me dy shtete, të cilën ne do të bashkëkryesojmë, duhet të ndihmojë në ringjalljen e një perspektive politike si për izraelitët ashtu edhe për palestinezët”, shtoi ai.

Më shumë se 700 palestinezë u vranë dhe mbi 900 të tjerë u plagosën në sulmet e reja ajrore izraelite në Rripin e Gazës që nga e marta, duke shkatërruar armëpushimin dhe marrëveshje për shkëmbimin e të burgosurve që u zbatua në janar.

Gati 50 mijë palestinezë janë vrarë, kryesisht gra dhe fëmijë, dhe mbi 112,000 janë plagosur në një fushatë brutale ushtarake izraelite në Gaza që nga tetori i vitit 2023. /rtsh/