Real Madridi shpartallon Las Palmas, merr ‘timonin’ në La Liga

Real Madridi ka shënuar fitore të thellë në shtëpi ndaj Las Palmas, në kuadër të xhiros së 20-të në La Liga.

“Los Blancos” i arkëtuan pikët e plota falë një përmbysje nga 0:1 në 4:1, sfidë që e dominuan në të gjitha aspektet.

Mysafirët i befasuan të gjithë për të kaluar në epërsi pas vetëm 40 sekondave falë Silvas, që u asistua nga Ramirez (1’).

Sidoqoftë, Reali u kthye në lojë përmes Kylian Mbappe që u tregua i saktë nga pika e bardhë (18’).

Brahim Diaz pastaj e përmbysi epërsinë pas bashkëpunimit fantastik me Lucas Vazquez (33’).

Ndërsa, vetëm tre minuta më vonë Kylian Mbappe shënoi golin e dytë personal dhe të tretin për madrilenët (36’).

Francezi në fakt shënoi sërish për het-trikun, megjithatë goli u anulua nga VAR-i për pozitë jashtë loje.

Madrilenët ishin mahnitës edhe në pjesën e dytë, ku Rodrygo u përkujdes për golin e katërt nga afërsia pas asistimit të Fran Garcias (57’).

Situata për Las Palmas veçse u vështirësua sapo Ramirez u ndëshkua me karton të kuq, shkaku i një ndërhyrje të rëndë (64’).

Reali shënoi edhe dy gola përmes Jude Bellingham dhe Federico Valverde, megjithatë të dyja u anuluan nga VAR-i.

Me këtë triumf, Reali bëhet lideri më i ri në La Liga me 46 pikë, dy mbi Atleticon derisa Las Palmas zë pozitën e 14-të me 22 sosh.