Prishtina – Drita, sfida kryesore gjysmëfinale e mesjavës në Kupë

Pas ndeshjeve të Superligës, në mesjavë do të rikthehet Kupa e Kosovës në futboll.

Dy ndeshje interesante na presin të mërkurën në sfidat e para të gjysmëfinales, e cila luhet në sistem vajtje-ardhje.

Dueli kryesor i gjysmëfinales do të jetë ai mes Prishtinës dhe Dritës.

Dueli i parë më 3 prill do të luhet në stadiumin “Sami Kelmendi” në Lipjan me Prishtinën vendëse në derbin Bardhekaltër, shkruan “Express”.

Ndërkaq, loja e kthimit do të luhet në Gjilan dy javë më vonë, respektivisht më 17 prill.

Prishtina do të luajë “all-in” në Kupë, përmes së cilës synon të dalë në Evropë duke e pasur parasysh se në kampionat ka mbetur prapa.

Por, as Drita s’e ka të sigurt pjesëmarrjen në garat evropiane përmes Superligës, ku aktualisht është e treta, vetëm tri pikë përpara Malishevës, që është e katërta.

Ndërkohë, këtë të mërkurë do të luhet edhe sfida tjetër gjysmëfinaliste mes dy ekipeve lokale, Suhareka dhe Ballkani.

Kurse, loja e kthimit do të luhet dy javë më vonë me kampionin e dyfishtë kosovar që do të luajë në cilësinë e vendësit.

Të dy ndeshjet e së mërkurës do të nisin në orën 15:00.