Osmani me kryediplomatin turk diskutuan për partneritetin mes dy vendeve

Presidentja Vjosa Osmani është takuar me ministrin e Punëve të Jashtme të Turqisë, Hakan Fidan, me të cilin ka thënë se kanë diskutuar për partneritetin e fortë mes Kosovës dhe Turqisë.

Presidentja Osmani ka shtuar se do të vazhdojnë tutje angazhimin për ta forcuar partneritetin.

“Gjithmonë kënaqësi ta takoj mikun e çmuar të Kosovës, ministrin e Punëve të Jashtme të Turqisë, Hakan Fidan. Diskutuam partneritetin e fortë dypalësh midis Kosovës dhe Turqisë në shumë fusha me interes të ndërsjellë. Mirënjohës për mbështetjen e palëkundur të Turqisë ndërsa vazhdojmë angazhimin tonë të përbashkët për forcimin e mëtejshëm të këtij partneriteti”, ka shkruar Osmani në platformën X, raporton rtk.

Për këtë takim ka njoftuar edhe Ministria e Punëve të Jashtme e Turqisë.

“Ministri i Punëve të Jashtme, Hakan Fidan, u prit nga Vjosa Osmani-Sadriu, Presidente e Republikës së Kosovës, në margjinat e Samitit të Krerëve të Shteteve dhe Qeverive të Procesit të Bashkëpunimit të Evropës Juglindore, në Tiranë”, thuhet në njoftimin e tyre.