Nuk përjashtojmë pjesëmarrjen në takim me LV-në, por Konjufca s’është thirrës legjitim

Nënkryetari i Lidhjes Demokratike të Kosovës, Lutfi Haziri, ka deklaruar se partia është e hapur për të shqyrtuar pjesëmarrjen në takimet e paralajmëruara politike, por ka vënë në pikëpyetje legjitimitetin e Glauk Konjufcës si organizator.

Haziri tha se LDK-ja e sheh me serioz çdo ftesë për dialog politik, por kërkon që takimet të kenë format, agjendë dhe nevojë të qartë para se të merr pjesë.

“Në nivelin e takimeve definohet agjenda, formati, nevoja e takimit – gjithçka duhet me u ditë saktë para se me shku. LDK-ja do ta shqyrtojë seriozisht këtë çështje, sikur çdo çështje tjetër,” u shpreh ai.

Ai ngriti dyshime nëse Konjufca po flet në cilësinë e kryetarit të Kuvendit apo si nënkryetar i Lëvizjes Vetëvendosje, duke theksuar se kjo paqartësi e bën ftesën më pak të besueshme.

“Nuk është e qartë nëse Glauk Konjufca po flet si nënkryetar i Vetëvendosjes apo si kryetar i Kuvendit,” tha Haziri.

Haziri, po ashtu, e quajti paradoksale situatën politike, duke kritikuar qasjen e kryeministrit Albin Kurti, i cili, sipas tij, po i anashkalon partitë opozitare në proceset politike, ndërkohë që zhvillon takime me liderët e komuniteteve minoritare në zyrën e qeverisë.

“Qysh kryetari i LDK-së duhet me shku në takim që e thërret nënkryetari i Vetëvendosjes, kur kryetari i Vetëvendosjes e takon Adem Hoxhën në zyrë të Qeverisë? Respekt për partinë e goranëve, por formati duhet me qenë i qartë,” tha Haziri.