Nis grumbullimi i Dardanëve për duelet vendimtare për EURO 2026

Kombëtarja A e Kosovës në hendboll është grumbulluar të dielën mbrëma në prag të ndeshjeve vendimtare për kualifikim në Euro 2026.

Të enjten nga ora 20:15 në Pallatin e Rinisë dhe Sportit në Prishtinë, Dardanët presin Kombëtaren e Ishujve Faroe. Ndërkohë të dielën e javës së ardhshme, më 11 maj, Kombëtarja jonë luan ndaj Holandës në ‘s-Hertogenbosch.

Sipas Federatës së Hendbollit të Kosovës, këto janë ndeshjet e fundit të fazës së fundit kualifikuese për Evropianin e vitit të ardhshëm.

Pas katër ndeshjeve, Kombëtarja jonë i ka tri pikë. Nga katër pikë i kanë Ukraina e Holanda, ndërsa Ishujt Faroe janë në vendin e parë me pesë pikë.

Gara në grup është plotësisht e hapur. Të gjitha katër kombëtaret janë në garë për kualifikim në Evropian.

Për Kombëtaren tonë, kualifikimi do të ishte sukses historik.

Për të shpresuar në kualifikim, kombëtares sonë i duhet fitorja të enjten me Ishujt Faroe. Me fitore gjasat për kualifikim janë të mëdha. I gjithë fokusi është te kjo ndeshje, ndërsa përkrahja e shikuesve është e domosdoshme.