Murati për rritjen e pagave prej 6.8 eurosh: Ekzekutohen nga ky muaj

Ministri i Financave, Hekuran Murati, ka thënë se me rritjen e pagave prej 6.8 eurove, është bërë një rritje prej 27 milionë eurove në vit.

“Përfitimi mujor prej 6.8 euro apo vjetor prej 81.6 euro dikujt mund të mos i duket shumë, mirëpo nëse e shohim në tërësi, janë rreth 2.3 milion euro në muaj apo rreth 27 milionë euro në vit, që nuk do të mblidhen si tatim nga shteti por do të mbesin në xhepat e qytetarëve”, ka shkruar ai në Facebook.

Tutje ka thënë se pagat në sektorin publik sot ekzekutohen duke aplikuar shkallët e reja të tatimit në të ardhura personale, ku 250 eurot e para janë të liruara nga tatimi.

“Si rezultat i këtij ndryshimi, secili punonjës në Kosovë, nga ky muaj e tutje do të paguajë më pak tatim, e rrjedhimisht do të marrë pak më shumë pagë neto”, ka vazhduar postimi, raporton rtk.