Man United shkarkon Ashworth, zbulohen kandidatët e tij për trajner

Dan Ashworth është shkarkuar nga posti i drejtorit sportiv te Manchester United vetëm disa muaj pasi mori detyrën.

Ndërkohë, janë zbuluar edhe emrat që ai kishte sugjeruar për të zëvendësuar Erik ten Hag.

Pavarësisht se fitoi FA Cup dhe nënshkroi një kontratë të re, Ten Hag u shkarkua në tetor, pasi bordi dhe tifozët humbën durimin me trajnerin holandez.

Besimi i Ashworth ndaj tij nuk dha rezultat, duke e detyruar të gjente një zëvendësues në mes të sezonit.

Vetëm disa javë pasi United emëroi trajnerin e Sporting Lisbon, Ruben Amorim, edhe Ashworth u largua nga klubi.

‘Manchester Evening News’ raporton se ai kishte mbështetur dy trajnerë të njohur për të marrë drejtimin e ekipit.

Një nga kandidatët e tij kryesorë ishte Gareth Southgate, me të cilin kishte bashkëpunuar me sukses gjatë kohës në Federatën Angleze.

Një tjetër emër në konsideratë ishte trajneri i Newcastle, Eddie Howe, me të cilin Ashworth kishte punuar ngushtë për dy vite.

Ndërkohë, Ashworth është në kërkim të sfidës së tij të radhës, ndërsa emërimi i Amorim te United ka marrë reagime të përziera.

Sipas ‘SportItalia’, 54-vjeçari mund të bëjë lëvizjen e tij të tretë brenda 12 muajve, pasi është në bisedime me klubin e Arabisë Saudite, Al-Nassr. Ashtu si Newcastle, edhe Al-Nassr është në pronësi të Fondit Publik të Investimeve të Arabisë Saudite.