Madridi bëhet gati për festën madhështore, një milion tifozë presin kampionët

Spanja po përgatitet për një pritje historike të kampionëve të saj të botës, pasi kombëtarja e Luis de la Fuentes rikthehet në Madrid pas triumfit 1-0 ndaj Argjentinës në finalen e Kupës së Botës 2026.

Sipas autoriteteve spanjolle, rreth një milion tifozë pritet të mbushin rrugët e kryeqytetit për të festuar titullin e dytë botëror në historinë e “La Roja”-s, të fituar falë golit të Ferran Torresit në vazhdime.

Skuadra spanjolle do të mbërrijë në Madrid gjatë ditës së hënë, ndërsa në aeroport do të sjellë edhe trofeun e Kupës së Botës, pas një turneu të shkëlqyer që e kurorëzoi si kampione të Evropës dhe të botës njëkohësisht.

Programi i festimeve parashikon fillimisht një pritje zyrtare nga Mbreti Felipe VI në Pallatin Zarzuela. Më pas, futbollistët dhe stafi teknik do të hipin në autobusin e hapur, i cili do të përshkojë rrugët kryesore të Madridit deri në sheshin ikonë “Cibeles”, vendi tradicional i festimeve të kombëtares spanjolle.

Në shesh do të organizohet ceremonia qendrore, ku lojtarët do të përshëndesin tifozët dhe do të festojnë së bashku suksesin historik.

Për shkak të numrit të madh të njerëzve që pritet të marrin pjesë, autoritetet kanë marrë masa të jashtëzakonshme sigurie. Mbi 2.000 policë dhe 400 pjesëtarë të Gardës Civile do të angazhohen për mbarëvajtjen e festimeve, ndërsa do të ketë edhe organizim të veçantë të transportit publik.

Atmosfera festive kishte nisur që menjëherë pas vërshëllimës së fundit të finales. Rrugët e Madridit u mbushën me mijëra tifozë që festuan deri në orët e para të mëngjesit, ndërsa shumë prej tyre kaluan natën në qendër të qytetit në pritje të rikthimit të kampionëve.

Ky është titulli i dytë botëror për Spanjën, pas atij të fituar në vitin 2010 në Afrikën e Jugut. Për më tepër, Spanja hyn në histori si vendi i parë që mban njëkohësisht titullin e kampionit të botës si në futbollin e meshkujve, ashtu edhe në atë të femrave, pas suksesit të kombëtares së femrave në vitin 2023.

Ndërkohë, “La Roja” do të ketë mundësinë të mbrojë titullin në Kupën e Botës 2030, e cila do të organizohet në Spanjë, Portugali dhe Marok.