Lautaro para sfidës me Barçën: Jemi të zemëruar, jemi gati për këtë ndeshje të madhe

Pas tre humbjeve radhazi, Interi është thirrur të bëjë autokritikë në natën më të rëndësishme, atë të Barcelonës, në një ndeshje që ngjall kujtime të këndshme për tifozët zikaltër.

Të mërkurën, në orën 21:00, në Montjuïc do të zhvillohet akti i parë i gjysmëfinaleve të Ligës së Kampionëve.

Në prezantimin e kësaj sfide Lautaro Martinez nuk e fshehu zhgënjimin e tij në momentin e vështirë të përjetuar nga zikaltërit.

“Jemi të zemëruar, kemi pasur një ecuri të madhe, por kemi munguar në ndeshjet e fundit në nivel fizik dhe mendor. Jemi të vetëdijshëm për këtë. Ne kemi folur për këtë dhe i kemi thënë shumë gjëra njëri-tjetrit. Jemi gati për këtë ndeshje të madhe”.

“Si mund ta mundim Barcelonën? Ne kemi treguar tashmë se mund të luajmë ndeshje të rëndësishme në stadiume të mëdha. Tani duhet të rikuperojmë dhe të përgatisim detajet përfundimtare. Thuram është shumë i rëndësishëm për ne, le të shohim nëse ai do të luajë nesër apo jo. Unë tashmë u kam thënë shokëve të mi gjithçka që duhet për të rregulluar atë që duhet bërë. Do të shohim nesër nëse ka pasur efekt”.