Kualifikueset “Euro 2024”, Shqipëria U19 e nis me humbje

Shqipëria U19 e ka nisur me humbje aventurën në kualifikueset e Europianit 2023/2024 duke u mundur nga Irlanda në “Elbasan Arena” me rezultatin 3-1.

Një ndeshje që nisi me gol që në fillimin e saj, me irlandezët që konkretizuan lojën e tyre në minutën e 5-të me anë të Mark O’Mahony.

Megjithatë, kuqezinjtë arritën të barazojnë në minutën e 23-të me anë të Erald Krasniqit. Pjesa e parë e takimit përfundoi në barazim 1-1, ndërsa fraksioni i dytë nisi me dy zëvëndësime për kuqezinjtë. Trajneri Ervin Bulku aktivizoi Dejvi Duron dhe Adi Kurtin.

Irlanda mori përsëri epërsinë duke realizuar sërish me Mark O’Mahony, ndërsa tre minuta më vonë Franco Umeh realizoi edhe të tretin për Irlandën. Pavarësisht pësimit të golave të shpejtë, kuqezinjtë u munduan të reagonin, Klevis Haxhari goditi shtyllën. Gjithçka u mbyll me fitoren 3-1 për Irlandën.

Sfida e radhës për Shqipërinë U-19 do të jetë ndaj Belgjikës U19, më datë 18 nëntor në orën 14:00.  Ndeshja e fundit do të jetë ndaj Sllovenisë U19, më datë 21 nëntor në ora 14:00.

Ndeshja tjetër e grupit mes Sllovenisë U19 dhe Belgjikës U19 përfundoi në barazim 1-1. Sfida u luajt në “Arena Egnatia” dhe të dy golat u realizuan në fraksionin e dytë. Jaka Cuber Potocnik i dha avantazhin Sllovenisë në minutën e 52, ndërsa Belgjika vendosi baraspeshën në të 66-ën falë golit të Arjan Malic.

Në bazë të rregullores së UEFA-s, dy skuadrat e renditura në vendin e parë të çdo grupi do të avancojnë në “Elite Round”, së bashku me skuadrën e tretë më të mirë në të gjitha grupet në këto kualifikuese. Faza finale e Europianit të moshës U19 do të zhvillohet në Irlandën e Veriut në verën e vitit 2024.

Kalendari dhe renditja e Grupit 13 të Europianit U19:

Datë 15.11.2023

Slloveni– Belgjikë 1-1

Irlandë – Shqipëri 3-1

Datë 18.11.2023

Irlandë – Slloveni “Arena Egnatia” ora 11:00

Belgjikë – Shqipëri “Elbasan Arena” ora 14:00

Datë 21.11.2023

Belgjikë – Irlandë “Arena Egnatia” ora 14:00

Shqipëri – Slloveni “Elbasan Arena” ora 14:00

Renditja:

Irlandë 3 pikë

Belgjikë 1 pikë

Slloveni 1 pikë

Shqipëri 0 pikë