Krasniqi: Rizgjedhja e Trumpit, dëshmi e forcës së demokracisë amerikane

Kryetari i Partisë Demokratike të Kosovës, Memli Krasniqi, e ka uruar Donald Trumpin dhe popullin amerikan, për fitoren në zgjedhjet presidenciale.

Krasniqi, përmes një postimi në Facebook, ka thënë se rizgjedhja e Trumpit është dëshmi e forcës së demokracisë amerikane.

“Në emër të Partisë Demokratike të Kosovës, i përcjell urimet më të përzemërta Presidentit Trump dhe popullit amerikan në një tjetër rrugëtim të përbashkët përpara. Rizgjedhja e Presidentit Trump është dëshmi e forcës së demokracisë amerikane”, ka thënë Krasniqi.

Po ashtu, Krasniqi konsideron se lidhja mes Kosovës dhe Amerikës shkon gjithmonë përtej politikës.

“Lidhja mes Kosovës dhe Shteteve të Bashkuara të Amerikës shkon gjithmonë përtej politikës. Roli i SHBA-së në rrugëtimin e Kosovës drejt lirisë, shtetformimit dhe shtetndërtimit është dëshmi e një raporti të ndërtuar mbi vlera, besim dhe respekt të veçantë. Ndërsa Kosova vazhdon përpjekjet që të ndërtojë një të ardhme më të mirë, ne ritheksojmë përkushtimin e plotë për forcimin e aleancës sonë më të rëndësishme, duke rifuqizuar raportet Kosovë – SHBA, përmes mundësive të reja për bashkëpunim, zhvillim, paqe e stabilitet në rajonin tonë”, ka shkruar Krasniqi, në Facebook.