KINË/22 viktima pas zjarrit në një restorant

Të paktën 22 persona u vranë dhe tre u plagosën pas një zjarri që shpërtheu në një restorant në qytetin verilindor kinez, Liaoyang, raportoi transmetuesi shtetëror CCTV.

Shkaku i zjarrit, i cili shpërtheu rreth mesditës, nuk është përcaktuar ende.

Zjarret në ndërtesat publike janë një problem i përsëritur në Kinë, shpesh të lidhura me zbatimin e dobët të rregulloreve të sigurisë.

Presidenti Xi Jinping, duke folur në Shangai, u bëri thirrje punonjësve të shpëtimit ”të bëjnë çdo përpjekje për të trajtuar të plagosurit dhe për të mbështetur familjet e viktimave”.

Ai gjithashtu urdhëroi një hetim të shpejtë për shkakun e zjarrit dhe u bëri thirrje autoriteteve lokale në të gjithë vendin të rrisin masat e sigurisë përpara festës së ardhshme të 1 Majit, Ditës së Punës, një periudhë kulmore e udhëtimeve në të gjithë vendin.

Liaoyang, e cila ka rreth 1,83 milion banorë në zonën e saj metropolitane, ndodhet në provincën Liaoning, në jug të kryeqytetit rajonal Shenyang. /atsh/