Juventusi lëviz në merkato: Vjen Djalo, ikën Kean

Juventusi po lëviz në merkato. Bardhezinjtë planifikojnë një afrim të ri dhe një largim nga skuadra në këto ditë të para të janarit.

Cristiano Giuntoli ka nisur lëvizjet e para në merkato dhe bardhezinjtë janë shumë pranë blerjes së Tiago Djaló nga Lille.

Juventusi arriti të mposhtë rivalët e Interit për transferimin e mbrojtësit portugez. Po negociohen detajet e fundit mes palëve dhe pritet që lojtari të firmosë një kontratë 4 vite e gjysmë me “zonjën e vjetër”.  Është arritur marrëveshja me Lille, që do të marrë menjëherë 3.5 milionë euro dhe do të ruajë 10% të kartonit në rast rishitjeje në të ardhmen.

Allegri mirëpret një lojtar të ri, por bëhet gati për të humbur një lojtar në repartin e avancuar. Për shkak të shpërthimit të Yıldız, Moise Kean është drejt largimit nga Torino (në formë huazimi).

Monza dhe Fiorentina janë dy skuadrat që kanë shfaqur interes për sulmuesin. 23-vjeçari kërkon më shumë hapësira, sepse synon një vend në Euro 2024 me Italinë dhe në kampin bardhezi nuk janë kundër largimit të tij.