Izraeli intensifikon ofensivën mbi Gazën, mijëra të vrarë

Situata në Rripin e Gazës po përshkallëzohet në mënyrë dramatike, me ushtrinë izraelite që ka intensifikuar ofensivën e saj si nga toka ashtu edhe nga ajri.

Sulmet e fundit kanë përfshirë zonat e mbetura në jug, veçanërisht Khan Younis, duke shkaktuar viktima të shumta dhe dëme të mëdha në infrastrukturë.

Bombardimet kanë prekur gjithashtu objekte shëndetësore, përfshirë spitale ku një fëmijë palestinez humbi jetën si pasojë e ndërprerjes së trajtimit mjekësor, sipas Organizatës Botërore të Shëndetësisë.

Ministria e Shëndetësisë në Gaza raportoi sot se numri i viktimave ka arritur në 50,983 të vrarë dhe 116,274 të plagosur, ndërsa Zyra e Medias e Qeverisë paralajmëron se numri real mund të jetë shumë më i lartë me mbi 61,700 të vdekur, duke përfshirë edhe mijëra të zhdukur nën rrënoja.

Vetëm në 24 orët e fundit janë vrarë 38 persona, ndërkohë që një trup i gjallë është nxjerrë nga rrënojat. Që nga fundi i armëpushimit më 18 mars, forcat izraelite kanë vrarë të paktën 1,613 palestinezë dhe kanë plagosur mbi 4,200 të tjerë. Një pjesë e konsiderueshme e viktimave janë gra dhe fëmijë.

Tensionet janë të larta edhe në Jerusalemin Lindor, ku mbi 765 kolonë izraelitë kanë hyrë në kompleksin e xhamisë Al-Aqsa nën mbrojtjen e ushtrisë për të kryer rituale fetare gjatë festës së Pashkëve.

Guvernatorati i Jerusalemit e ka cilësuar këtë akt si një provokim të qëllimshëm dhe një shkelje flagrante të status quo-së ndërkombëtare.

Në një deklaratë të re, një zyrtar i lartë i Hamasit ka shprehur gatishmërinë për të liruar të gjithë pengjet izraelite në këmbim të një marrëveshjeje serioze shkëmbimi të të burgosurve dhe garancive të qarta ndërkombëtare për përfundimin e luftës në Gaza.

Negociatat po vazhdojnë në Kajro, nën ndërmjetësimin e Egjiptit, Katarit dhe SHBA-së, por Hamasi akuzon Izraelin për obstruksion dhe mungesë vullneti.

Sipas raportimeve izraelite, një propozim i ri përfshin lirimin e 10 pengjeve në këmbim të angazhimeve amerikane për fazën e dytë të një armëpushimi të mundshëm. Megjithatë, pengesa mbetet mungesa e besueshmërisë ndaj angazhimeve izraelite. /rtk/