Injoron Arabinë, agjenti: Lautaro mendon vetëm për Interin, nuk dëgjon kur i flas për ofertat e tjera

Agjenti i Lautaro Martinez, Alejandro Camana, ka thënë dhe njëherë tjetër për mediet italiane se qëllimi i sulmuesit argjentinas është që të rinovojë me Interin.

Camana theksoi se Martinez nuk do t’ja dijë, jo vetëm për ofertat nga Arabia Saudite, por për asnjë ofertë tjetër, pasi është duke menduar vetëm për “zikaltërit”.

“Arabia është një merkato plot tundime. Lautaro ka pasur shumë oferta dhe jo vetëm prej andej. Kur i tregoj për këto mundësi, ai më thotë: ‘Inter vetëm, Inter…’. Rinovimi? Lautaro tani është te Inter sepse i pëlqen klubi dhe skuadra. Ai është i lumtur, është kapiten i ekipit dhe është në pritje të një fëmije. Duhet të punojmë që ai të jetë gjithmonë i lumtur. Unë mendoj se rinovimi është një mundësi. Ne folëm për këtë si me Interin ashtu edhe me Lautaron. Besoj se është e rëndësishme që të gjithë të kenë një lidhje të qëndrueshme”, deklaroi agjenti i sulmuesit.