Historike: Kosova për herë të parë në top 100 në renditjen e FIFA-s

Kombëtarja e Kosovës në futboll, sot ka shënuar rritjen më të madhe në historinë e saj që nga pranimi në FIFA.

Dardanët në përditësimin e renditjes së FIFA-s, nga vendi 101 ka kaluar në pozitën e 99-të, që është pozicionimi më i mirë që kur Kombëtarja e Kosovës është e njohur me të drejta të plota nga shtëpia e futbollit botëror.

Dy fitore në muajin tetor, si dhe triumfi ndaj Lituanisë në nëntor në Ligën e Kombeve, e kanë bërë të mundur që një rritje e tillë të arrihet.

13 maji i vitit 2016 ishte një ditë historike për Kosovën, pasi Fadil Vokrri me delegacionin e FFK-së asokohe e anëtarësuan Kombëtaren në FIFA, 10 ditë pasi ndodhi anëtarësimi në UEFA.

E filluam nga vendi 190, për të pasur ngritje e ulje të vazhdueshme ndër vite.

Rritja më e madhe ndodhi në vitin 2018, ku u përmirësua pozita për 24 vende. 178 ishte renditja më e ulët në atë vit, teksa e përfunduam vitin në vendin e 131-të.

Që nga ai vit, rritja ka vazhduar në çdo moment, duke pasur herë pas herë ulje të vogla si shkak i rezultateve që nuk priteshin.

Renditja më e mirë që nga dita e pranimit për Kosovën u arrit më 30 nëntor të vitit 2023, duke marrë vendin e 101-të, atë që kemi pasur deri më sot në tri përditësime që nga ajo ditë.

Ky rekord u thye me përditësimin sot. Kombëtarja e Kosovës është për herë të parë në top 100 skuadrat më të mira të FIFA-s, pasi tani renditen në vendin e 99-të.

Sezoni i kënaqshëm në Ligën e Kombeve, ku përfunduam në vendin e dytë me katër fitore e dy humbje në Ligën C, ishte më meritori për këtë rritje historike.

Falë këtyre paraqitjeve të muajve të fundit, Kombëtarja e Kosovës në mars të vitit 2025 do ta ketë mundësinë që të luajë në play-off për t’u promovuar në Ligën B, ku përballë do ta ketë Islandën në dy takime.

Kujtojmë se më 13 dhjetor, Dardanët, do të mësojnë kundërshtarët me të cilët do të përballen në kualifikimet për Kupë të Botës 2026.