Haradinaj: Kosova duhet të ndërtojë të ardhmen mbi themelet e forta të dijes

Kosova duhet të ndërtojë të ardhmen mbi themelet e forta të dijes, vlerave dhe përkushtimit ndaj interesit kombëtar, ka thënë kryetari i Aleancës për Ardhmërinë e Kosovës, Ramush Haradinaj me rastin e shkuarjes në koalicionin për Kosovën Fituese të Prof. Veli Kryeziun.

“Kënaqësi e veçantë të mirëpresim në familjen e Kosovës Fituese Prof. Veli Kryeziun, intelektual i shquar për kontributin e tij në fushën shkencore të historisë”, ka shkruar Haradinaj në Facebook.

Ai tutje ka thënë se bashkimi i forcave me personalitete të shquara akademike si Prof. Kryeziu, dëshmon qartë se vizioni për Kosovën Fituese po konsolidohet me ekspertizën më të lartë profesionale dhe vlerat më fisnike të atdhedashurisë.