Gjithmonë në mbështetje të kombëtares, Tifozat Kuq e Zi festojnë 20-vjetorin

Kanë përkrahur gjithmonë kombëtaren shqiptare në çdo sfidë. Si në humbje edhe në fitore, ata kanë qënë gjithmonë aty, duke mbështetur djemtë kuqezi.

Grupimi Tifozat Kuq e Zi feston 20-vjetorin e krijimit dhe fton të gjithë anëtarët, por edhe përkrahësit e thjeshtë të kombëtares që të festojë bashkë me ta në sheshin Skëndërbej në 23 dhjetor.

“20 vjet TKZ është një rrugëtim i gjatë. Në çdo stadium shqiptar dhe të huaj ku kemi shkuar, ne kemi qenë aty për dhe me Kombëtaren tonë. Ndërkohë që Kombëtarja është rritur profesionalisht dhe sapo e ka siguruar kualifikimin e saj të dytë në Kampionatin Europian të Futbollit, edhe ne, Tifozat Kuq e Zi, jemi rritur.

Misioni ynë i përhershëm është që ne të jemi gjithmonë të pranishëm aty ku luan ekipi ynë kombëtar, me një përkrahje të fortë dhe të palëkundur, pavarësisht nëse luan kundër një ekipi të madh apo të vogël në emër dhe pa marrë parasysh nëse loja luhet larg apo afër. Në shi apo në diell, me fitore apo me humbje, ne kemi qenë gjithmonë aty, në mbështetje të ngjyrave kuq e zi: kudo ku është ngritur flamuri ynë kombëtar, aty kemi qenë të pranishëm ne, Tifozat Kuq e Zi, të rreshtuar pas banorit tonë “TIFOZAT KUQ E ZI” dhe “O SA MIRË ME QENË SHQIPTAR!”

Ky 20-vjetor i themelimit të grupimit tonë përkon edhe me kualifikimin e Kombëtares sonë të Futbollit në Kampionatin “Euro 2024” dhe për rrjedhojë festa jonë këtë fundvit bëhet edhe më e madhe. Kremtimi madhështor do të organizohet ditën e shtunë, datë 23 dhjetor 2023, në orën 18:00, në Sheshin Skënderbej, në Tiranë.

Festa është e hapur për të gjithë, si për anëtarët aktivë dhe anëtarët ndër vite të TKZ-së, ashtu edhe për çdo shqiptar që, me zemër, e dëshiron bashkimin e të gjithë shqiptarëve anembanë botës përreth një ekipi të vetëm kombëtar”, shkruhet në njoftimin në faqen zyrtare të grupimit Tifozat Kuq e Zi .