Flick pas përmbysjes spektakolare ndaj Celta Vigos: Rikthim i pabesueshëm

Trajneri i Barcelonës, Hansi Flick, ka deklaruar se skuadra e tij e meritoi plotësisht fitoren dramatike 4-3 ndaj Celta Vigos, pas një përmbysjeje të jashtëzakonshme që u vulos në minutën e 98-të nga penalltia e realizuar nga Raphinha.

“Fituam. Luajtëm kundër një skuadre të madhe që kishte marrë rezultate të mira në dhjetë ndeshjet e fundit,” u shpreh Flick pas ndeshjes.

“Ata kanë një ide shumë të qartë loje dhe trajneri i tyre ka një plan të mirë. E dinim që do të vuanim”, theksoi ai.

Ai vlerësoi lart Raphinhan, autorin e golit të fitores.

“Raphinha është shumë i rëndësishëm për ne dhe gjithmonë ka një qëndrim pozitiv që përhapet tek e gjithë skuadra”, pohoi Flick.

Flick zbuloi gjithashtu një detaj interesant për momentin e penalltisë.

“Nuk i shikoj kurrë penalltitë. Vetëm kryqëzova gishtat dhe u gëzova shumë kur pashë festën. I thashë se kishim nevojë për të dhe bëri një punë të shkëlqyer. Ky rikthim ishte i pabesueshëm”, deklaroi tekniku gjerman.