Finalja e Euro 2024: Spanjës i rikthehen mbrojtësit, Sauthgate nuk ndryshon skemë

Të dielën në mbrëmje në 14 korrik do të luhet finalja e madhe e Euro 2024 midis Spanjës dhe Anglisë.

Në Berlin do të kurorëzohet kampionia e re e kontinentit. Spanjollët synojnë të shkruajnë historinë, duke u bërë skuadra e parë që fiton 4 herë Kampionatin Europian, ndërsa anglezët kërkojnë trofeun e parë kontinental.

Skuadrat po stërviten maksimalisht, që të jenë në gjendjen optimale në ndeshjen më të rëndësishme të vitit.

Buzëqesh trajneri i spanjollëve De La Fuente, pasi rikthehen në dispozicion të skualifikuarit Carvajal dhe Le Normand, që munguan ndaj Francës, por që do të jenë titullarë në finalen e madhe.

Tekniku i Spanjës nuk pritet të bëjë ndryshime të tjera dhe në sulm konfirmohet Morata i mbështetur nga treshja Yamal-Olmo-Williams.

Vetëm gjendja e Trippier shqetëson trajnerin Sauthgate në prag të finales. Tekniku pritet të luajë me të njëjtin formacion që startoi kundër Holandës në gjysmëfinale. Konfirmohet mbrojtja me 3 lojtarë, ndërsa dyshja Foden-Bellingham do të mbështesë Kane në majën e sulmit.