Faton Neziri, ‘Ylli i Javës’

Federata e Futbollit të Kosovës dhe sponsori i Superligës, Albi Mall, vazhdojnë të ndajnë çmimin “Ylli i Javës”.

Ky çmim për javën e 27-të në Albi Mall Superligë i është ndarë futbollistit të KF Dukagjini, Faton Neziri.

Vlerësimi i më të mirit të javës është bërë nga Komisioni i Veteranëve të Futbollit, në përbërje të Shyqeri Salihu, Bujar Asllani dhe Fatmir Mehmeti. Ky komision vendosi që çmimi “Ylli i Javës” për xhiron e njëzet e shtatë t’i takojë Faton Nezirit, i cili shënoi dy golat në fitoren 3:1 të Dukagjinit në ndeshjen e rëndësishme kundër KF Llapit.

Pasi mori këtë çmim, Neziri u shpreh i lumtur që u vlerësua më i miri i javës.

“Ndeshjen e kemi përgatitur gjatë gjithë javës, kemi pasur stërvitje shumë të mirë dhe ia arritëm qëllimit për të marrë tri pikë të plota. Atmosfera te KF Dukagjini është shumë e mirë dhe çdo ndeshje e luajmë pa presion. Nga performanca jonë kemi merituar më shumë pikë dhe të jemi më mirë në renditjen tabelare. Megjithatë, ka edhe shumë ndeshje dhe besoj se do të pozicionohemi më mirë”, ka thënë Neziri për faqen zyrtare të FFK-së.

“Është ndjenjë shumë e mirë të shpallesh ‘Ylli i Javës’, andaj jam shumë i lumtur dhe e shfrytëzoj rastin të falënderoj bashkëlojtarët, trajnerin dhe udhëheqësin e klubit për besimin”, ka theksuar Neziri.