Emery tregon pse nuk ia shtrëngoi dorën e Artetës pas humbjes së Aston Villës

Trajneri i Aston Villës, Unai Emery, ka sqaruar arsyen pse nuk pati shtrëngim duarsh me Mikel Artetën pas humbjes së rëndë 4-1 ndaj Arsenalit, një rezultat që i dha një goditje ambicieve të Villës për titull.

Pas përfundimit të ndeshjes, Emery u drejtua menjëherë drejt tunelit pa u takuar me homologun e tij spanjoll, gjë që nxiti reagime dhe diskutime në rrjetet sociale, ku u aludua për mungesë respekti mes dy trajnerëve.

Megjithatë, pas ndeshjes, tekniku i Villës theksoi se situata ishte keqkuptuar. Ai zbuloi se kishte pritur Artetën, por trajneri i Arsenalit ishte i zënë duke festuar fitoren me stafin e tij teknik.

“Po, por është diçka shumë e thjeshtë. Mund ta shihni. Pas përfundimit të ndeshjes, rutina ime është gjithmonë e njëjtë: shtrëngoj duart shpejt dhe më pas shkoj me trajnerët dhe lojtarët e mi, ose drejt dhomave të zhveshjes,” u shpreh Emery.

“Unë po prisja, po prisja. Sigurisht, ai ishte i lumtur dhe po festonte me stafin e tij, ndaj vendosa të hyja brenda. Për mua nuk ka asnjë problem,” shtoi ai.

Emery theksoi se nuk ka asnjë konflikt mes tij dhe Artetës, duke e cilësuar situatën si një moment të zakonshëm pas një ndeshjeje emocionale.