Dy vjet nga ‘Marshi për Drejtësi’, Krasniqi: Jemi më të bashkuar më shumë se kurrë në pritjen e kthimit të heronjve tanë

Kryetari i PDK-së, Memli Krasniqi, ka kujtuar “Marshin për Drejtësi”, i cili është mbajtur para dy viteve për të kërkuar drejtësi për ish-krerët e UÇK-së që po gjykohen në Hagë.

Ai ka vlerësuar se ajo ditë ishte e mbushur me krenari, dhimbje dhe vendosmëri.

Krasniqi ka shkruar në “Facebook” se Kosova është në pritje të kthimit të heronjve të saj.

“Dy vite më parë, rreth njëqind mijë qytetarë u ngritën si një zë i vetëm në Prishtinë për të mbrojtur të vërtetën tonë historike, për të kërkuar drejtësi për Hashim Thaçin, Kadri Veselin, Jakup Krasniqin, Rexhep Selimin dhe shokët e tyre – luftëtarët e lirisë, të cilët sakrifikuan gjithçka për Kosovën. Ishte një ditë e mbushur me krenari, dhembje dhe vendosmëri – sepse kur padrejtësia bëhet ligj, qëndresa bëhet detyrë! Sot, ndërsa kujtojmë atë ditë, jemi më të bashkuar se kurrë në pritjen e kthimit të heronjve tanë në atdhe. Pas një sage të gjatë, besojmë se ata do të kthehen ashtu siç shkuan – të lirë dhe të pafajshëm! Historia nuk rishkruhet, e vërteta nuk mund të ndryshohet dhe lufta e UÇK-së ishte dhe mbetet e drejtë. Liria ka emër!”, ka shkruar Krasniqi.