Daja para duelit me Astanën: Jemi përgatitur për fitore

FC Ballkani nesër do të luajë në udhëtim tek Astana në kuadër të fazës së grupeve në Ligën e Konferencës.

Kampioni i Kosovës ishte mundur nga Astana në duelin e parë të luajtur në “Fadil Vokrri”, me rezultat 1-2.

Skuadra e Ilir Dajës dje ka zbarkuar në tokën e Kazakistanit dhe të gatshëm për sfidën e radhës me Astanën.

Trajneri Daja në konferencën për medie, një ditë parë duelit me Astanën, e pranon se ndeshja e radhës nuk do të jetë aspak e lehtë, por ai është i bindur se skuadra e tij, mund ta fitojë ndeshjen.

“Do të na pëlqente të fitonim, por është një ndeshje e vështirë edhe në aspektin taktik dhe fizik. Nuk mund të jap përqindje se kush do ta fitoj nesër ndeshjen, sepse futbolli nuk është shkencë ekzakte. Unë kam përgatitur djemtë e mi të fitojnë. Nëse e marrim eksperiencën Astana ka më shumë, pasi ka marr pjesë në Ligën e Kampionëve dhe Ligën e Evropës. Kemi udhëtuar dy ditë para ndeshjes për tu ambientuar, kemi punuar sot me kohën lokale dhe nesër do të jemi gati”, ka shtuar Daja.

Ndeshja Astana-Ballkani fillon në orën 16:30.