Bind ndaj Brest, Monaco “kërcënon” PSG-në në garën për titullin

Monaco rikthehet te triumfi, duke bindur ndaj Brest-it në takimin e javës së 11-të të Ligue 1.

Pas fitores 2-0 në “Stade Louis II”, skuadra e Hutter vazhdon të mbetet kërcënuese ndaj Paris Saint-Germain në garën për titullin kampion.

Miqtë mund të kishin marrë avantazhin në minutën e 11’, pasi Le Douaron gjeti rrugën drejt rrjetës, por pas verifikimit në VAR ai gol u anulua për faull.

Megjithatë sfida u zhbllokua në minutën e 16’, moment në të cilin Zakaria realizoi dhe kaloi Monaco-n në avantazh.

Brest pati mundësinë për të barazuar në minutën e 27’ me Brassier, por goli i tij u anulua për pozicion të parregullt.

Në pjesën e dytë Monaco do të shënonte sërish, me Golovin që realizoi golin e dytë për ekipin e tij në minutën e 69’.

Si të mos mjaftonin dy golat e pësuar, në minutën e 90+3’ Brest mbeti me dhjetë lojtarë sepse Brassier u ndëshkua me kartonin e dytë të verdhë, duke lënë ekipin e tij në inferioritet numerik.

2-0 dhe Monaco ngjitet në vend të dytë me 23 pikë, një më pak se PSG kryesuese, teksa Brest renditet në vend të gjashtë me 15 pikë.