Benzema: Pas daljes në pension, do të doja të kthehesha përkrah Perezit

Sulmuesi francez në një intervistë dhënë gazetarit spanjoll Edu Aguirre, ka folur për të ardhmen e tij pas pensionimit nga futbolli aktiv.

Ish-ylli i Real Madridit, i cili tani po bën karrierë në Arabinë Saudite, thotë se dëshiron të mbetet në botën e futbollit.

“Nuk e di ende se kur do të tërhiqem. Më kanë mbetur edhe dy vjet nga kontrata me Al Ittihad. Gjithçka varet nga mënyra se si ndihem çdo vit. Por diçka është e sigurt, të qenit trajner është më e komplikuar se të qenit lojtar. Unë ende dua të mbetem pjesë e botës së futbollit dhe do të doja të kthehesha në këtë sport në një formë tjetër”, ka thënë Benzema.

Francezi nuk e përjashton mundësinë që sërish të kthehet tek Real Madridi po në një pozitë tjetër.

Benzema kujtoi momentin e transferimit të tij nga Lyon te Real Madridi dhe besimin e madh që i dha presidenti Florentino Perez.

“Kur kalova te Reali, ai i tha babait tim se për sa kohë ai do të ishte në Madrid, do të isha edhe unë. Ai ishte personi i parë që telefonova kur vendosa të largohem. Ai nuk e kuptoi plotësisht vendimin tim. I thashë se lojtarët e rinj, si Vinicius dhe Rodrygo, ishin të gatshëm të merrnin përsipër”, theksoi Benzema.

Asi francez tregon qartë se edhe pse është larguar nga Real Madridi, lidhja e tij me klubin mbetet e fortë, ndërsa e ardhmja e tij në botën e futbollit ende është e hapur.