BE: Tarifat e SHBA-së goditje e madhe për ekonominë globale

Vendimi i presidentit amerikan, Donald Trump, për të vendosur tarifa reciproke ndaj të gjitha vendeve të botës u gjykua ashpër nga evropianët, të cilët megjithatë vazhdojnë të apelojnë për një zgjidhje të negociuar.

Presidentja e Komisionit Evropian, tha Ursula von der Leyen e cilësoi këtë vendim si një goditje të madhe për ekonominë globale.

“Të jemi të qartë për pasojat e mëdha. Ekonomia globale do të vuajë masivisht. Pasiguria do të rritet ndjeshëm dhe do të çojë në një rritje të mëtejshme të proteksionizmit. Pasojat do të jenë të rënda për miliona njerëz në mbarë”, tha Ursula von der Leyen .

Megjithëse BE-ja ka paralajmëruar vazhdimisht se do të kundërpërgjigjet me masa të njëjta, shefja e Komisionit Evropian u përmbajt nga dhënia e detajeve për veprimet konkrete që do të ndërmarrë blloku evropian ndaj tarifave të presidentit Trump.

Edhe ministrja e Jashtme e Gjermanisë Annalena Baerbock, i bëri thirrje politikbërësve në Uashington që të angazhohen në dialog.

“Ne kemi qenë gjithmonë të qartë se nuk dëshirojmë përshkallëzim të mëtejshëm të konfliktit tregtar. Marrëdhëniet e hapura dhe të drejta tregtare janë në interes të ekonomisë, qytetarëve, konsumatorëve dhe kompanive. Për këtë arsye, gjatë javëve të fundit, u kemi bërë të qartë amerikanëve se jemi gjithmonë të hapur për dialog. Ne nuk duam një luftë tregtare”, tha Baerbock.

Ministrat e ekonomisë të vendeve anëtare të BE-së do të mblidhen javën e ardhshme për t’u dakorduar rreth një përgjigje të përbashkët ndaj masave të administratës amerikane.

Nga ana tjetër, grupet e biznesit në kontinent, ndonëse kritikuan tarifat e reja, i bënë thirrje BE-së të përmbahet nga veprime që mund të çojnë në një përshkallëzim të plotë të konfliktit tregtar. /rtk/